కృష్టుని మేలు కొలుపులు

 

1. కేశవ యని నిన్ను వాసిగ భక్తులు వర్ణించు చున్నారు మేలుకో,

వాసవ వందిత వసుదేవ నందన  వైకుంఠ వాసుడా మేలుకో || కృష్ణా తెల్లవారవచ్చేను ||

2. నారాయణా నిన్ను - నమ్మిన భక్తుల  కరుణ బ్రోతువు వేగ మేలుకో,

శరణన్న రక్షణ బిరుదు నీకున్నది  శశిధర సన్నుతా మేలుకో || కృష్ణా తెల్లవారవచ్చేను ||

3. మాధవ యని నిన్ను యాదవులందరు మమత జెందుతున్నారు మేలుకో,

చల్లని చూపుల తెల్లని నామము  నల్లని నాస్వామి మేలుకో || కృష్ణా తెల్లవారవచ్చేను ||

4. గోవింద యని నిన్ను గోపికలందరు  గొల్లవాడందురు మేలుకో,

గోపీమనోహర గోవర్ధనోద్ధార  గోపాలబాలుడా మేలుకో || కృష్ణా తెల్లవారవచ్చేను ||

5. విష్ణు రూపముదాల్చి విభవము దర్శించి విష్ణు స్వరూపుడ మేలుకో,

దుష్టసంహారక దురితము లెడబాపు సృష్టి సంరక్షక మేలుకో || కృష్ణా తెల్లవారవచ్చేను ||

6. మధుసూదన నీవు మగువ తోడుత గూడి మరచి నిద్రించేవు మేలుకో,

ఉదయార్క బింబము ఉదయించు వేళాయె వనరుహ లోచన మేలుకో || కృష్ణా తెల్లవారవచ్చేను ||

7. త్రివిక్రమా యని శక్రాదులందరు విక్రమ మందురు మేలుకో,

శుక్రాది గ్రహములు సుందరరూపము చూడగోరుచున్నారు మేలుకో || కృష్ణా తెల్లవారవచ్చేను ||

8. వామన రూపమున భూదాన మడిగిన పుండరీకాక్షుడా మేలుకో,

బలిని నీ పాదమున బంధన జేసిన కశ్యప నందనా మేలుకో || కృష్ణా తెల్లవారవచ్చేను ||

9. శ్రీధర గోవింద, రాధా మనోహర యాదవ కులతిలక మేలుకో,

రాధాపధూమణి రాజిల్క నంపింది పొడచూతువుగాని మేలుకో || కృష్ణ తెల్లవారవచ్చేను ||

10. హృషీకేశ యీ భువియందు ఋషులందరు వచ్చి కూర్చొన్నారు మేలుకో,

వచ్చినవారికి వరములు కావలె వైకుంఠ వాసుడా మేలుకో || కృష్ణా తెల్లవారవచ్చేను ||

11. పద్మనాభ నీదు పత్ని - భాగాదులు వచ్చి కూర్చున్నారు మేలుకో,

పరమ తారకమైన పావన నామము పాడుచు వచ్చిరి మేలుకో || కృష్ణా తెల్లవారవచ్చేను||

12. దామోదరా యని దేవతలందరు దర్శించ వచ్చిరి మేలుకో,

భూమి భారము మాన్ప బుధుల బ్రోవను రావె భూకాంత రమణుడా మేలుకో || కృష్ణా తెల్లవారవచ్చేను ||

13. సంకర్షణ నీవు శత్రుసంహార మొనర్ప సమయమై యున్నది మేలుకో,

పంకజాక్షులు నీదు పావన నామము పాడుచు వచ్చిరి మేలుకో || కృష్ణా తెల్లవారవచ్చేను||

14. వాసుదేవా నీకు భూసుర పత్నులు భుజియింప దెచ్చిరి మేలుకో,

భూసురంబుగ యాగసంరక్షణ కొరకు వర్ణింపు చున్నారు మేలుకో || కృష్ణా తెల్లవారవచ్చేను ||

15. ప్రద్యుమ్న రూపుడ అర్జున వరదుడ దుర్జన సంహార మేలుకో,

అబ్జవంశమునందు ఉద్భవించియు కుబ్జ నాదరించిన దేవ మేలుకో || కృష్ణా తెల్లవారవచ్చేను ||

16. అనిరుద్ధ యని నిన్ను అబ్జభవాదులు అనుసరింప వచ్చె మేలుకో,

అండజవాహన అబ్ధిసంహరణ దర్భశయన వేగ మేలుకో || కృష్ణా తెల్లవారవచ్చేను ||

17. పురుషోత్తమా యని పుణ్యాంగనలంతగ పూజలు జేతురు మేలుకో,

పురుహూతవందిత పురహర మిత్రుడ పూతన సంహార మేలుకో || కృష్ణా తెల్లవారవచ్చేను ||

18. అధోక్షజ మిమ్ము స్మరణ జేసినవారి దురితము నెడబాప మేలుకో,

వరుసతోడుత మిమ్ము స్మరణ జేసినవారి వందన మొసగెద మేలుకో || కృష్ణా తెల్లవారవచ్చేను ||

19. నారసింహ నిన్ను నమ్మిన భక్తుల కరుణబ్రోతువు వేగ మేలుకో,

శరణన్న రక్షణబిరుదు గల్గిన తండ్రి శశిధరసన్నుతా మేలుకో || కృష్ణా తెల్లవారవచ్చేను ||

20. అచ్యుతా యని నిన్ను సత్యముగ వ్రతవిధులు కొనియాడవచ్చిరి మేలుకో,

పచ్చని చేలమూ అచ్చంగ దాల్చిన లక్ష్మీమనోహర మేలుకో || కృష్ణా తెల్లవారవచ్చేను ||

21. జనార్ధనా నీవు శత్రుసంహార మొనర్చ సమయమైయున్నది మేలుకో,

పంకజాక్షులు నీదు పావననామము పాడుచువచ్చిరి మేలుకో || కృష్ణా తెల్లవారవచ్చేను ||

22. ఉపేంద్రా యని నిను సువిదలందరు గూడి యమునతీర మందున్నారు మేలుకో,

గోపీకాంతలు నీదురాక గోరుచున్నారు మురళీనాదవినోద మేలుకో || కృష్ణా  తెల్లవారవచ్చేను||

23. హరి యని నిన్ను కొనియాడ గోపికా జనులంత వచ్చిరి మేలుకో,

అష్టభార్యలు నీదు రాకగోరుచున్నారు వనమాలికాధర మేలుకో || కృష్ణా తెల్లవారవచ్చేను||

24. శ్రీకృష్ణా యని నిన్ను గోపాల బాలురు బంతులాడ వచ్చిరి మేలుకో,

కాళీయ మర్ధన కౌస్తుభ మణిహార కంససంహరణా మేలుకో || కృష్ణా తెల్లవారవచ్చేను ||

25. శ్రీరామ యని మునులు స్థిరభక్తితో మిమ్ము సేవించుచున్నారు మేలుకో,

తాటకీసంహార ఖరదూషణాంతక కాకుత్థ్సకులరామా మేలుకో || కృష్ణా తెల్లవారవచ్చేను ||

26. తెల్లవారవచ్చె దిక్కులు తెలుపొందె నల్లని నాస్వామి మేలుకో,

వేళాయె గోవులమందకు పోవలె గోపాల బాలుడా మేలుకో || కృష్ణా తెల్లవారవచ్చేను ||

         

హరా కృష్ణ హరా కృష్ణ కృష్ణ కృష్ణ హరే హరే